Ukit

In homage to her father Salvador Leano, Lani Leano Mallorca wrote this poem and sent it to the Bantayog ng mga Bayani Foundation late in 2010, upon learning of her father's inclusion in Bantayog's roster of martyrs and heroes. It was patterned after Pete Lacaba's poem The Nameless.

With Apologies to Jose Lacaba's “The Nameless”

Silang walang pangalan
Mukha’y mahirap tandaan
Di pansin ng lipunan
Tinapak - tapakan 
Niyurak-yurakan
Ng may kapangyarihan!
Isa na kaya riyan 
Ating mahal na lumisan? 

Wala nga bang nakakaalam?

Walang  nakikialam?

Sila nga bay kinalimutan

Ng madla’t sambayanan?

Kung wari ay limot man

Inaalala din naman

Nitong Bantayog na samahan

Sila’y ating pasalamatan!

 

Sa lahat po ay higit 

Diyos Amang nasa langit

Sa nang-aapi’y nagngitngit! 

Mahal niya ang maliliit!

Di Niya hahayaan

Na mapabayaan

Dugo’t buhay na inalay

Nitong ating mga mahal!

 

Sa Banal na Kasulatan

Ating matutunghayan

Anghel o hayup man

May mga pangalan!

Kahit nga ang lebyatan

Sa gitna ng karagatan

Mga bituing maririlag

Ngala’y Kanyang tinatawag!

 

Tayo pa kaya

Mababale-wala?

Tayong pinaka-obra

Sa buong likha Nya?

Kung sa unang tingin

Parang di pansin

Ating pakalimiin

Ating pakanamnamin

 

Atin pong pakinggan

Wika ng Kasulatan,

Ito’y kanyang paalala

Sa sangkatauhan

“Malilimot kaya ng ina ang sarili niyang anak? 

Hindi kaya niya mahalin ang sanggol niyang iniluwal? 

Kung inang lumilimot sa anak ay mayroon man, 

Kahit sandali, ika’y di kakalimutan.

Hinding-hindi malilimutan.

Nakaukit sa aking palad ang iyong pangalan! 

Di ba walang kasingtamis

Salita ng ating  Ama?

Pinapawi yaong hapis

Takot at pangamba! 

 

Walang sinumang tao

Ang walang pangalan

Pagkat ang Diyos Ama

Inukit na Niya, 

Sa kanyang palad pa

Di na mabubura!

Ngalan mo, ngalan ko

Mahal Niya tayo! 

 

Sa mga mapang-api

Ito ang masasabi

Kami ay may kakampi

Matatapos na ang gabi!

Tayo nga’y tulong –tulong

At patuloy na isulong

Katotohan,  katarungan

Kapayapaan, kalayaan!

 

Ikaw na nag-akala

Na wala ngang pangalan

Sa mundong ibabaw na ginagalawan

Sana’y maging aral itong munting tula

Ama nating nasa langit

Lagi kang sinasambit

At di kakalimutan

Magpakailan pa man!